La colère de la rue à Corti : 10 à 12 000 manifestants pour dénoncer un < scandale d'État > et réclamer la vérité

C’erani trà 10 è 12 000 parsoni in Corti, duminica, par marcà u so sustegnu à Yvan Colonna.

Ghjovani, studianti, eletti... u populu si hè mossu da ugni parti lla Corsica, par dumandà ch’idda si sappia a virità, dopu à issa prova d’assassiniu contru à Yvan Colonna.

Ci era à veru un mari d’omini, una fila chì curria da a piazza lla gara à u cursu Paoli. Si sò visti in a filara di l’aienti banderi canacchi, è un sustegnu forti si hè fattu senta in Sardegna è in Catalogna.

Davanti à a suttiprifittura, era statu missu da i forzi di l’ordini un muru para manifistanti. I ciandarmi ani tiratu bombi lacrimatoghji, ma ani ancu fattu usu di u cannonu à acqua è di i bombi acciuncatoghji. I manifistanti ani tiratu uni pochi di prughjittili.

24 ghjovani corsi sò stati ferti, è presi in carica da i spinghjifoca.

À senta ni a prifittura llu Cismonti, 4 ciandarmi sariani stati ferti. U so statu avaria nicissitatu a so presa in carica in una struttura uspitaliera.

Trà i prisenti, u prisidenti llu cunsigliu esecutivu lla Corsica hà rigritatu l’azzioni riprissiva llu statu, chì ùn n’hà datu segni di paci, à u cuntrariu.

Steti à senta à Gilles Simeoni.

Jean-Christophe Angelini era ancu iddu d’issa manifistazioni. U capifila llu gruppu Avanzemu è merri di Portivechju dici chì oghji, a virità hè più chè mai di gran’ primura. U statu francesu devi risponda à st’esigenza di ghjustizia.

Steti à senta à Jean-Christophe Angelini.

U diputatu lla siconda circuscrizzioni pumuntinca, Paul-André Colombani, hà presu in carica i ghjovani corsi ferti. Hà criticatu cù forza u disprezzu è u mancu di chjarura llu statu francesu.

Steti lu à senta.

Corsica Libara dici chì « nè i viulenzi lla pulizza, chì hà fertu parichji ghjovani corsi, nè i bucii pazzeschi di a tesa ufficiali par ciò chì tocca à a sorti d’Yvan Colonna, ùn a li farani à svià a ghjuvantù corsa da u so ideali . Di quissa, n’hà datu a prova cù a so ditirminazioni ».

« Soli a lutta è a mubilisazioni di tutti l’energii pudarani fà schiattà a virità, è caccià da issi prighjoni murtifari i patriotti prighjuneri llu statu francesu », dici in chjudenda Corsica Libara.