L'Associu Sulidarità réclame le rapprochement de Nicolas Battini à Borgu
(A redazzioni d'Alta Frequenza) - L'Associu Sulidarità hà urganizatu ssu dopu meziornu (marcuri) una cunfarenza di stampa à l'Università di Corsica in Corti, pà fà cunnoscia u casu di un ghjovanu militanti incarceratu ind'u rughjoni parighjinu. Niculau Battini, 20 anni, imprighjunatu prima ind'a prighjoni di a Santé, hè statu alluntanatu calchì settimana fà nant'à una dicisioni disciplinaria in Bois-d'Arcy. L'Associu Sulidarità dumanda oghji cù forza l'avvicinamentu di Niculau Battini inde l'isula, in Borgu, com'è par parechji altri prighjuneri pulitichi corsi incarcerati in cuntinenti.
Steti à senta à Ghjuvan Filippu Antolini, pà l'Associu Sulidarità.
Pà ciò chì tocca a visita di Christiane Taubira in Corsica dumani (ghjovi), l'Associu Sulidarità hà vulsutu cuntintà si di un cumunicatu diffusatu in principiu di dopu meziornu. Sulidarità dici ch'ellu hà ampartu chì, un annu dopu avè cunnisciutu un casu simuli, "hè torna un funziunariu" chì hà da riceva l'associu. "In ssi cundizioni, s'ellu ùn ci nisun annunziu d'avanzati pulitichi nant'à u cartulari di i prighjuneri pulitichi ùn andaremi micca à ssu scontru postu chì ùn ci hè micca un blucchimi amministrativu ma una vuluntà pulitica di ùn risolva micca u prublema", spieca l'Associu Sulidarità. Ss'ultimu compii a so cumunicazioni cusì: "ùn ghjuvaremi micca di scusa à un mezu scontru umanitariu soprattuttu chì l'amministrazioni cunnosci di manera parfetta i nostri rivindicazioni".
Sur le même sujet
