L'association corse des élus de montagne en pleine expansion
(A redazzioni d'Alta Frequenza) - L'associu corsu di l'eletti di muntagna hà tinutu issu sabbatu in Corti a so assemblea ghjinirali. Si trattava di difiniscia i statuti di manera chjara, di sceglia i primi istanzi, è di metta in ballu un foghju di strada pà l'annu 2013, frà altru cù l'elaburazioni di un pianu di sviluppu di a muntagna corsa, integratu à u PADDUC. Un associu isulanu chì hà dumandatu à essa liatu à l'urganisazioni aurupea, pà veda i so specificità, com'è quilli di i tarritorii mediterranei simuli, presi in contu. Da nutà, ed hè impurtanti di pricisà la, chì ùn ci hè micca bisognu d'appartena à l'associu naziunali, l'ANEM, pà raghjunghja l'entità aurupea. L'ANEM chì, rammintemu la, avia vistu u so cungressu in Bastelica d'uttrovi scorsu, marcatu da una pulemica : quilla inghjiru à u fattu chì Ghjuvan Filici Acquaviva, unu di i mutori di l'associu corsu di l'eletti di a muntagna sighi statu cacciatu da u cumitatu direttori, par mutivi d'ordini "ghjacubinu" diciaremi. Ritruvaremi ind'i nostri edizioni à vena Ghjuvan Filici Acquaviva nant'à issu sughjettu.
Sur le même sujet
