L'Assemblea di a Ghjuventù officiellement installée
(A redazzioni d'Alta Frequenza) - Hè ssu marti ch'ella hè stata stallata di manera ufficiali a prima Assemblea di a Ghjuventù in Aiacciu. Hè cumposta di 62 membri trà 16 è 25 anni, cù in più u presidenti di l'Assemblea di Corsica à u so capu, nant'à u mudellu di l'Assemblea di a futura Cullittività di Corsica. T'hà quattru culleghji : u prima cù 21 studianti di l'Università di Corsica scelti da i sindicati studientini, u sicondu cù 8 ghjovani attivi scelti da i raprisintanti di i sindicati prufiziunali, un terzu culleghju di 10 liceani, scelti in u Cunsighju Accademicu di Vita Liceana è un ultimu culleghju di 23 candidati ditti individuali, scelti da una ghjuria d'eletti nant'à candidatura. Un'istanza nova cù un avisu cunsultativu, à chì l'Assemblea di Corsica si pudarà arrimbà, è chì hà da viaghjà grazia à sfarenti cumissioni liati frà altru à a cultura, a lingua, l'ambienti, l'affari suciali, l'educazioni, a furmazioni, u sviluppu ecunomicu o ancu i trasporti è l'affari aurupei. Dopu a stallazioni, i gruppi sò stati difiniti : Ghjuventù Naziunalista (42 membri), Ghjuventù Paolina (8 membri), Centru Diritta (4 membri), Ghjuventù Umanista (3 membri) è 1 membru chì ùn hè micca scrittu.
Steti à senta à Sonia Battistelli, a presidenti di u gruppu Ghjuventù Naziunalista, chì faci parti di u culleghju di i candidati individuali.
Sur le même sujet
