L'AC Ajaccio dépose le bilan et prépare sa reconstruction

L’AC Aiacciu hà fattu luni a so dichjarazioni di bancarotta in tribunali di cumerciu d’Aiacciu.
A prucidura hà da cumincià par andà sinu à a liquidazioni ghjudiziaria. 

A scelta di u ridrizzamentu ghjudiziariu pari scantata, parvia di i debiti.
A liquidazioni, à senta ni certi voci, pudaria essa annunciata marcuri.

Cù a fini di a SAS, sparisci tutta a struttura prufiziunali cù parichji dicini d’impiechi, vali à dì 100 o ancu 150.
U centru di furmazioni, ricunnisciutu pà u so beddu travaddu, sparisci ancu iddu.
Tanti ghjovani ghjucadori, ch’erani in cuntrattu d’aspiranti o stazianti, ùn ani più squadra oramai. Certi, forsa, truvarani calchì squadra prufiziunali par accodda li, ma certi altri inveci ùn l’avarani, issa pussibilità.

Issu pessimu scinariu era aspittatu, dopu chì a DNCG achi sclusu à l’ACA d’ugni cumpitizioni naziunali, cuntendu ancu a Cuppa di francia di u 2026.

Tuttu hè in mani oramai à l’associu « Athlétic Club Ajaccien ».
Tutta a squadra dirigenti attuali hà da dimissiunà in i ghjorna à vena par fà piazza à una nova dirizzioni.

Si sentini curra parichji voci – cuntradittorii certi volti - pà u nomu di u prossimu prisidenti.
Si senti dì ancu ch’una quindicina d’imprisarii si saria impignata par riempia à pena a cascia di l’associu è cuntribuì à a ricustruzzioni lla squadra.

U Cullittivu Biancu è Russu si hè mubilizatu ancu iddu. Dipoi u principiu di l’annu, avia aghjà accoltu 45 000€. Sta mani, cù a nova chjama lampata, n’erani aghjà ghjunti 10 000 altri.
I socios pudariani dunqua avè unu – o ancu dui – riprisintenti à u prossimu cunsigliu d’amministrazioni.

Infini, ma ùn hè sicuru l’affari ad oghji, l’ACA pudaria prisintà un bughjettu capaci à essa accittatu da a DNCG par riparta in Naziunali 3.
Ci vurria pà iss’affari ch’iddu sichi fattu appellu innanzi à ghjovi ch’entri di l’ultima dicisioni di a DNCG. 

Tandu, a dicisioni a piddaria u Cumitatu Dirittori di a Federazioni francesa di u Ballonu.

Par casu ch’iddu venga chivi dinò un fiascu, l’ACA si ni falaria in u campiunatu R1 di Corsica, chì si faria di manera accizziunali cù 13 squadri. A Liga Corsa di u Ballonu hà datu cunfirma d’iss’infurmazioni issu dopu meziornu.
Ma quissu, u scinariu, u si vurriani sfrancà l’aiaccini.