Interventions multiples des sauveteurs en mer de la SNSM Propriano
Photo : SNSM Prupià
Hè stata bedda greva a ghjurnata di i salvadori SNSM di Prupià, in issa fin’di sittimana.
Arimani, i squadri sò stati mubilizati parichji volti, cù a cuurdinazioni uparaziunali di u CROSS MED è di u CODIS2A, par gistiscia uni pochi di situazioni, certi issendu successi à tempu.
In primu dopu meziornu, hè statu ingagiatu u patrugliori di surviglianza è salvamentu SNS 7-012 in i circonda di Baraci, parvia di pratichi nautichi piriculosi.
À pena dopu, a stessa navi hè stata mubilizata, in sustegnu à un VSAV di i spinghjifoca è à una squadra midicali di u SMUR, pà una minuanza di cori in marina di Portipoddu,
À tempu à quissa, un’altra squadra SNSM gistia, in cumplementu d’un VSAV, una parsona in arrestu cardiorispiratoriu in Prupià.
Po’, versu Capu Laurosu, quattru ziteddi in difficultà cù un paddle, ch’erani sviati à 400 metra di a costa, sò stati succorsi, senza avè ni danni.
Infini, in prima sirintina, un’uparazioni dilicata hà mubilizatu uni beddi pochi di mezi da succora un battellu à vela di 22 metra, chì sviaia versu Abartedda, dopu à un dannu di mutori è senza pussibilità di manuvrà, cù una sola parsona à bordu.
A navi sviaia di manera piriculosa à circa centu metra da u bor’di mari, risichendu d’arrinà si.
Gramazia à l’azzioni cuurdinati di parichji i meza di succorsu, u battellu hè statu sicurizatu è rimurcatu senza pinseri altru.
Sur le même sujet
