Inondations à Ajaccio : l'aboutissement d'un dossier
(A redazzioni d'Alta Frequenza) - Tutti l'aiaccini, è soprattuttu quilli chì stani ind'u settori di i Canni è di i Salini s'arricordani di i famosi ghjurnati di u 29 è di u 30 di maghju di u 2008, è a notti particularmenti. L'Albitrone, chjamatu di manera più cumuna fiumicellu di i Canni, hà cunnisciutu forsa a so piena a più spettacularia custatata in parechji centinai d'annati. Dui metri d'acqua in certi palazzi di i Canni è di i Salini, decini di vitturi annigati, diguasti impurtantissimi pà parechji cumerci, ssa parti di a cità ùn avia mai cunnisciutu inundazioni simuli. Dopu à ssa catastrofa è un drama umanu mancatu di pocu, era più cà evidenti chì a cità d'Aiacciu ùn pudia più cuntinuà à sviluppà si cù ssa minaccia di u sempri. Malgradu calchì segnu di scuntintezza inghjinnatu forsa da u fattu chì l'alizzioni sighini vicini, u cartulari di ssu prublema hè statu presu in manu è un pianu contr'à l'inundazioni hè statu criatu; i travaghji principiarani da quì à calchì settimana. Paul Antoine Luciani s'hè impegnatu assai in ssu cartulari quì; ci hà dittu tutta a so suddisfazioni di veda crescia ssu cartulari di manera pusitiva è a so dillusioni di veda spuntà critichi cuncirnendu lu.
Steti à senta u primu aghjuntu di u merri d'Aiacciu.
