Incident quartier des Cannes à Ajaccio : l'appel au calme entendu
(A redazzioni d'Alta Frequenza) - Calchì decina di parsoni si sò aduniti ssa dumenica in principiu di sirata davanti a prifittura di Corsica pà fà cunnoscia a so collera dopu à l’incidenti accadutu sabbatu in u quartieru di i Canni in Aiacciu, induva una squadra di u SMUR hè stata inghjuliata. A chjama à u calmu lampata ind’a ghjurnata da i prufiziunali di a saluta dopu à u sprupositu ch’ellu cuminciava à pighjà « l’affari » nant’à i reti suciali hè stata intesa. Ssa dumenica, u prifettu di Corsica Bernard Schmeltz dinunziava in un cumunicatu l’incidenti contr’à i parsunali di u SAMU, ramintendu « chì ss’evenimenti ùn sò mancu appena simuli di pettu à quilli accaduti annu – nimu hè statu feritu in fatti – è dinunziava dinò « qualsiasi strumintalisazioni chì ni pudaria essa fatta ». I presidenti di l’Esecutivu è di l’Assemblea di Corsica, Gilles Simeoni è Ghjuvan Guidu Talamoni ani cumunicatu anch’elli a so « sulidarità à u SMUR è à tutti i membri di l’uspidali d’Aiacciu ». « Attaccà o inghjulià parsunali medicali o i salvadori hè à tempu calcosa di tristu è un affari chì ùn si pò accittà », dicini i dui presidenti, chì ani incalcatu dinò nant’à a chjama di u SMUR è di l’uspidali d’Aiacciu pà rilativizà l’incidenti è u so ricusu di qualsiasi spluttazioni o strumintalisazioni di quissu quì ». Infini a sizzioni Corsica di a Liga di i Diritti di l’Omu dinunzia u fattu chì « certi vidissini cù ss’evenimentu a pussibilità di fistighjà à modu soiu ciò chì hè accadutu annu in i Jardins de l’Empereur eppo in carrughju d’Aiacciu. Nant’à i reti suciali, provani à spluttà l’incidenti di u quartieru di i Canni in u sensu di l’odiu. A LDH dinunzia ssi manipulatori chì t’ani un scopu solu : distabilizà a sucità corsa à prò d’elli stessi. »
Sur le même sujet
