Incendie de la Parata à Ajaccio : le message du préfet de Corse
(A redazzioni d'Alta Frequenza) - Hè un focu assai sfarenti di pettu à quillu di Niolu (veda altrò) chì hà fattu mova a più pudè i servizi di succorsi è l'autorità in Aiacciu. Ssu focu, partutu in bor di mari annant'à u chjassu dittu di i duganeri, s'hè sviluppatu cù una rapidità scema annant'à a cullina sopra à Cala di Reta è chì colla fin'è u semaforu di a Parata. I fiari sò ghjunti guasgi vicinu à u Grandi Situ di a Parata è s'è i disguasti parini minimi visti da a strada di i Sanguinari, hè un veru paisaghju d'infernu chì spunta quand'ellu si passa pà a stradella andendu fin'è i cabanons. I fiari ani distruttu d'altrondi unu di quissi quì è u semaforu hè statu liccatu senza essa distruttu à u cuntrariu di ciò chì era statu annunziatu prima. Ciò chì hà inchietatu assai l'autorità, hè chì ssu focu pudia avè parcorsu tuttu u pulmoni verdi d'Aiacciu sopra à u Salariu. Una trentina d'ettari hè stata brusgiata ciò chì hà datu un'emuzioni assai forti à Laurent Marcangeli chì era prisenta sopralocu stamani prestu. U prifettu di Corsica era dinò quì prisenti ; hà fattu un puntu annant'à l'urganisazioni tennica di i succorsi è annant'à u rinforzu di u dispusitivu. U travaghju di i Canadair, ghjunti prestu stamani, hè statu resu assai difficiuli da u statu di u mari ind'u golfu d'Aiacciu. Malgradu tuttu, parechji presi d'acqua cumplicati ani parmissu à i Pélicans d'ammaistrà in furia i fiari.
Steti à senta à Christophe Mirmand, u prifettu di Corsica.
Sur le même sujet
