Incendie d'une salle de prière à Mezzavia : les réactions
(A redazzioni d'Alta Frequenza) - Dopu à u focu chì hà toccu una sala di prighera musulmana, ssu sabbatu à bon'ora in Aiacciu, parechji riazzioni sò ghjunti fin'è a nostra redazzioni. Gilles Simeoni, u presidenti di l'Esecutivu di Corsica è Ghjuvan Guidu Talamoni, u presidenti di l'Assemblea di Corsica, dicini ch'elli amparani "afflitti a distruzzioni cù u focu di un locu di cultu musulmanu in Mezavia". "L'ipotesi criminali pari missa in avanti da l'autorità in carica di l'inchiesta. S'ella si duvia cunfirmà, ramintemi chì attaccà un locu di cultu hè un attu impussibuli à capiscia è ad accittà, cuntrariu à i valori fundamintali di u populu corsu, è soprattuttu à a tradizioni multisecularia di tulerenza rilighjosa ch'ellu ci hà lasciatu Pasquale Paoli", aghjustani i dui presidenti. Pà contu soiu, u prifettu di Corsica priciseghja chì "i circustanzi esatti di ssu focu sarani ditarminati da l'inchiesta ghjudiziaria aparta sottu à l'autorità di u prucuratori di a Republica, prisenti duranti a nuttata sopralocu cù l'autorità prifitturali. L'ipotesi di un attu vulintariu duvaria essa missa in risultatu", dichjara Christophe Mirmand. Ss'ultimu "cundanna cù a siverità a più forti l'atti contr'à a libertà di cultu nant'à l'isula, chì sò offesi contr'à u pattu republicanu, è assicureghja i musulmani di Corsica Suttana di u so sustegnu sanu". U raprisintanti di u Statu priciseghja dinò chì "misuri sò presi da a pulizza è a gendarmeria naziunali pà rinfurzà a securità di i lochi di prighera in Corsica".
Sur le même sujet
