Incendie contre l'agence Century 21 à Ajaccio : la réaction de Corsica Libera
Corsica Libara hà parlatu, via un cumunicatu, di u incendiu chì hà toccu l’agenza immubiliari Century 21, in Aiacciu.
« In u cuntestu attuali, senza una riazzioni salutifara, a Corsica hà da perda pocu à pocu i so valori è i corsi, cullittivamenti, ani da avè di più in più tindenza à lacà a mani, inveci di purtà i lutti lighjittimi par a salvezza di i nosci valori è di ciò chì no’ semu.
Par disgrazia… a pulitica prumissa… ùn hè mai stata missa in anda… è tandu ùn si sò pussuti fà i scelti nicissarii da avvià un veru prughjettu di sucità, da fà ci adirì i corsi.
Hè malata oghji a noscia sucità. Causi, ci n’hè tant’è più, è i danni sò trimendi : s’iddu ùn si faci nudda, l’affari pudaria essa difinitivu.
Hè in issu cuntestu chivi ch’iddi affaccani, com’è ad ugni periudu dilicatu, buttafochi è uparazioni barbusini.
Hè sicuramenti ciò ch’hè successu, cù u focu criminali chì hà toccu u nosciu amicu è militanti Jean-Michel Emmanuelli, militanti di a prima ora chì mai ùn hà cunfusu, fendu u so mistieri longu à tanti anni, u so travaddu di gistiunariu di patrimoniu cù quiddu di spiculatori, uppostu à i so valori…
Corsica Libara si hè sempri impignata pà a paci è l’unità di u muvimentu naziunali, ùn hà mai pattighjatu cù i fundamintali chì ani da permetta dumani a salvezza di u populu corsu è di i so intaressi.
Malgradu i tanti pruvucazioni è qual’ch’iddi sichini, hà da cuntinuvà à impignà si da fà ch’iddi si ritrovini i forzi patriottichi chì u paesu, più chè mai, n’hà bisognu ».
