Incendie à la Parata : vive émotion pour le député-maire d'Ajaccio
(A redazzioni d'Alta Frequenza) - Hè un focu assai sfarenti di pettu à quillu di Niolu (veda altrò) chì hà fattu mova a più pudè i servizi di succorsi è l'autorità in Aiacciu. Ssu focu, partutu in bor di mari annant'à u chjassu dittu di i duganeri, s'hè sviluppatu cù una rapidità scema annant'à a cullina sopra à Cala di Reta è chì colla fin'è u semaforu di a Parata. I fiari sò ghjunti guasgi vicinu à u Grandi Situ di a Parata è s'è i disguasti parini minimi visti da a strada di i Sanguinari, hè un veru paisaghju d'infernu chì spunta quand'ellu si passa pà a stradella andendu fin'è i cabanons. I fiari ani distruttu d'altrondi unu di quissi quì è u semaforu hè statu liccatu senza essa distruttu à u cuntrariu di ciò chì era statu annunziatu prima. Ciò chì hà inchietatu assai l'autorità, hè chì ssu focu pudia avè parcorsu tuttu u pulmoni verdi d'Aiacciu sopra à u Salariu. Una trentina d'ettari hè stata brusgiata ciò chì hà datu un'emuzioni assai forti à Laurent Marcangeli chì era prisenta sopralocu stamani prestu.
Steti à senta u diputatu è merri d'Aiacciu.
Sur le même sujet
