I Primi Scontri di a tupunimia issu vennari in Cutuli è Curtichjatu
(Michaël Andreani - Alta Frequenza) - A cumuna di Cutuli è Curtichjatu urganizeghja dumani (vennari) à partasi da 5 ori di sera i Primi Scontri di a tupunimia. In partenariatu cù una squadra di vulintarii, quissa quì hà rializatu un travaghju fendu u censu di parechji maneri di i nomi di lochi, arrimbendu si nant’à tistimunianzi da lià issi nomi à usi, foli o fatti storichi. Una dimarchja da salvà un patrimoniu in periculu, chì veni à dà una leghjitimità à issa ghjurnata duva prufissori, studienti, spicialisti, universitarii, assuciativi è tant’altri sarani prisenti da intarvena pà scumparta a so sparienza ind’u duminiu à u publicu. Tuttu què, suvitatu di un dibattitu è scambii chì sarani arrighjistrati, da serva d’arnesi, da trasmetta daveru un prughjettu à u nivellu di l’Assemblea di Corsica, pà dà mezi tennichi è finanziarii à prò di a salvezza di u patrimoniu tupunimicu.
Stemi à senta à Ghjuvanni Biancucci, u merri di Cutuli è Curtichjatu.
Sur le même sujet
