Heurts entre lycéens et forces de l'ordre à Ajaccio : un jeune blessé par un tir de flash-ball
Sta mani, i liceani aiaccini ani manifistatu, da fà senta, una volta dinò, u so sustegnu à Yvan Colonna.
Dopu à una cunfarenza di stampa davanti à u liceu Litizia, i ghjovani, numarosi, sò mossi davanti à a prifittura.
In l’azzuffi sparati culandi, i forzi ditti di l’ordini ani lampatu bombi lacrimatoghji è acciuncatoghji, ma ancu flashballs.
Dui ghjovani sò stati ferti. Unu à u minimu di quissi hè statu presu in carica da i spinghjifoca, issendu statu toccu à a cannedda da un tiru di flashball.
Hè statu purtatu à u spidali d’Aiacciu.
Innanzi à iss’evenimenti, i ghjovani aviani presu a parolla, da fà senta a so collara, è a so brama di ghjustizia.
« Sè a prova d’assassiniu d’un omu ùn hè nudda par iddi, ùn sapemu qualissi iddi sò i so valori », ani dittu i liceani, chì ani dumandatu a dimissioni di eric dupond-moretti.
Issi ghjovani sò in collara bè, di pettu à unu statu chì ùn sà altru chè fà cuddà a prissioni è tirà à colpa di flashball à nantu à a ghjuvantù.
Steti à senta à Ghjuliu Antonu, unu d’issi liceani.
À fiancu à l’elevi, c’erani insignanti llu liceu Fesch d’Aiacciu.
Pascal Santoni, unu di quissi, hà dittu ch’idda era più chè chjara ch’iddu ci vulia à essa quì, in una spartera d’issa brama di ghjustizia è libartà.
Steti lu à senta.
Accumpagnà l’elevi, eccu un affari chì mancu ùn ci hè bisognu à parlà ni. Quissa a dici France Battini, insignanti ancu idda à u liceu Fesch.
Un si poni insignà certi valori à l’elevi longu à l’annata, è ùn essa chivi à sustena li quand’iddi bramani ghjustizia è virità.
Duvemu essa quì, ùn li pudemu lacà soli di pettu à issa situazioni, dici a insignanti chì no’stemu à senta.
