Haute-Corse : les intempéries causent de très fortes perturbations sur le réseau routier
(A redazzioni d'Alta Frequenza) - In Corsica Suprana, chì com'è a Corsica Suttana hè in vigilanza aranciu fin'è 10 ori di sera, s'è par avà ùn c'hè micca feriti ancu di grazia, a situazioni hè di i più pessimi à parechji nivelli. I spignifochi di Corsica Suprana sò stati ubligati à intarvena guasgi 800 volti annant'à inundazioni è pà pudè metta in securità setti parsoni, mentri chì annant'à a reta stradali, i difficultà sò maiò è numarosi. Prima, a RN 193 hè tagliata à u nivellu di Biguglia è di Borgu par via di una piena di u Bevincu, ciò chì rendi qualsiasi vulintà d'andà ind'a parti suttana di Bastia propiu vana; a scelta a più bona hè dunqua di stassini in Bastia ancu s'è vo steti inde l'agglumerazioni ind'u suttanu, postu chì u curdonu lagunariu di a Marana hè fora di pratica dinò, com'è a strada di u fronti di mari è u tunnellu di Bastia chì sò sarrati. U trenu hè bluccatu dinò ellu à u nivellu di Biguglia pà i listessi causi. Inde l'internu, a RN 198 hè tagliata versu Francardu, mentri ch'ellu hè guasgi impussibuli di ghjunghja fin'è u paesi d'Antisanti. A RN 200 trà Aleria è Corti hè tagliata è firmarà tagliata stanotti, mentri chì u tunnellu di A Ghisunaccia hè sarratu par avà. Stradi dipartimintali numarosi sò tagliati in parechji lochi com'è i stradi dipartimintali 43, 443, 7, 39, 344, 81 è 62, mentri chì in u Nebbiu, a circulazioni ferma difficiuli. U trafficu aereu hè suspesu dinò. U bulu trà Parighji è Bastia di 4 ori è 20 hè statu trasferitu ver di Figari. A prudenza a più maiò hè racumandata annant'à i stradi, ch'ellu ùn ci voli micca à pighjà di tutti i maneri fora d'avè un'urghjenza strema.
Sur le même sujet
