Haute-Corse et Corse-du-Sud en vigilance orange pour alerte vent
(A redazzioni d'Alta Frequenza) - A Corsica sana hè in vigilenza aranciu pà u risicu liatu à u ventu. Météo France priciseghja chì "u ventu à punenti soffia dighjà assai forti pà certi lochi di Corsica. Di fattu, ci sò buffulati à 148 chilometri à l'ora in Capicorsu, 122 chilometri à l'ora in L'Isula, 111 chilometri à l'ora in a Chjappa è 98 chilometri à l'ora in Pirtusatu. I venti da punenti à meziornu punenti ani da cuntinuà à rinfurzassi stasera è a notti chì veni in Corsica. Un primu parossisimu sarà toccu duranti a notti trà vennari è sabbatu. I venti sarà propiu forti da Balagna è Capicorsu, fin'è i lochi bastiacci è in muntagna. Buffulati trà 120 è 140 chilometri à l'ori sò privisti, pà certi lochi trà 140 è 190 chilometri à l'ora in Capicorsu. In Corsica Suttana, i venti di settori punenti suffiarani menu forti, tucchendu soprattuttu una parti à livanti di u dipartimentu, cù buffulati trà 100 è 110 chilometri à l'ora, pà certi lochi 120 chilometri à l'ora, o ancu appena di più. S'è in a matinata di sabbatu, i venti calarani appena, si rinfurzarani dopu meziornu è a sera. U latu uccidintali di a Corsica Suttana sarà tandu cuncirnatu. L'episodiu di venti forti si prulungarà in prima parti di a notti di sabbatu à dumenica. Ssa siconda pulsazioni sarà appena menu putenti cà a prima. I buffulati sarani trà 100 è 140 chilometri à l'ora da Balagna à Capicorsu, è in muntagna, certi volti più di 140 chilometri à l'ora in Capicorsu. Annant'à a parti livanti di a Corsica Suttana, i buffulati, menu forti, sarani trà 100 è 120 chilometri à l'ora. In sirata è a prima parti di a nuttata di sabbatu à dumenica, ssi valori cuncirnarani dinò i capi i più sposti di u latu uccidintali di a Corsica Suttana. Ssu ventu timpetuosu s'accumpagna da un mari forti o ancu assai forti annant'à u liturali uccidintali".
Sur le même sujet
