Hamza Sakhi quitte l'ACA pour le Wydad Casablanca
Photo : AC Aiacciu
Sabbatu à sera, l’AC Aiacciu hà ufficializatu a partenza di u so mezutarrenu Hamza Sakhi, chì si ni và à ghjucà cù a squadra di Wydad Casablanca.
Issa squadra maruccana l’avia annunciatu in u so effettivu chì sò parichji ghjorna.
« Hamza ci hà fattu veda quant’iddu era prufiziunali è quant’iddu era impignatu pà i nosci culori, ad ugni volta ch’iddu hè statu à nantu à u tarrenu », dici l’ACA via un cumunicatu.
Cù issa partenza, l’aiaccini perdini unu di i so ghjucadori di qualità, ma altru ùn si pudia fà, chì « issa partenza viaghja cù a pulitica d’ecunumia di a squadra, pà ammaistrà a massa salariali, l’affari issendu di gran’nicissità », spieca l’ACA in a so cumunicazioni.
Ùn si sà par avali s’idda hà da rimpattà calcosa, l’ACA, cù issu trasfirimentu.
Hè da nutà chì Tim Jabol-Folcarelli hè ancu iddu prontu à parta, chì sariani parichji i squadri di prima divisioni (Lorient, Montpellier, Saint-Etienne o Angers) à essa intarissati.
Sur le même sujet
