Grève SNCM: les transporteurs réclament de véritables solutions
(A redazzioni d'Alta Frequenza) - U cullettivu Dumane da fà, cumpostu d'urganisazioni prufiziunali numarosi è di membri di a sucità civili corsa, hà urganizatu ssu marti un'adunita davanti i lucali aiaccini di a SNCM, in riazzioni à u muvimentu di greva chì hà principiatu stamani (marti). L'intrata di u stabilimentu di a cumpagnia, dighjà sarrata da una tindina di farru, hè stata murata da i manifistanti; annant'à ssu muru, si pudia leghja un missaghju in trè parolli : "Basta transports faillite". I membri di u cullettivu ani vulsutu lampà una chjama à l'upinioni publica è fà ricullà i so inchietudini, cù una dumanda cintrali : "comu a Corsica dighjà assai tocca da a crisa ecunomica è una staghjoni chì ùn voli micca principià hà da suppurtà i cunsiquenzi di ssu cunflittu ?" Malgradu l'annunzi di u prifettu di Corsica è di u presidenti di l'Esecutivu dicendu chì tuttu saria fattu pà guarantiscia a cuntinuità tarrituriali, Dumane da fà dumanda chì una mansa di misuri sighini missi in opara, par asempiu pà ciò chì tocca l'indennisazioni di i danni ecunomichi di i prufiziunali. I traspurtadori, chì aviani minacciatu di bluccà a Corsica sana cù i socioprufiziunali, ùn sò ancu à passà à l'attu. Pà Oriano Chauron, chì faci parti di u sindicatu Strada Corsa è di u cullettivu Dumane da fà, i suluzioni palliativi ùn bastani più, ci voli una vera medicina guasgi pà riducia à u più i cunsiquenzi di una greva nova à ssu mumentu impurtantissimu di l'annata.
Steti à senta à Oriano Chauron.
