Ghjurnate Internaziunali et prisonniers politiques : l'appel à la mobilisation de Sulidarità
(A redazzioni d'Alta Frequenza) - Si sò compii i Ghjurnati Internaziunali di Corti 2016, i primi dipoi a ghjunta à i rispunsabilità di i naziunalisti à l'Assemblea di Corsica di dicembri scorsu. Urganizati da Corsica Libera in un locu emblematicu, quillu di a citadella di Corti, ssi ghjurnati ani vistu torna dilegazioni internaziunali numarosi participà à ssa messa pulitica di prima trinca. Riprissioni sindicali è pulitica, ma dinò prughjettu d'Auropa di i populi erani in u prugramma. Ma u tempu forti di ssi Ghjurnati, com'è sempri, era custituitu da u dibattitu nant'à a situazioni di a Corsica, intitulatu "Guvernu corsu : custruimu a Nazione", cù à a tribuna una parti impurtantissima di l'Esecutivu di Corsica è u presidenti di l'Assemblea di Corsica. Corsica Libera hà tinutu dopu u so tradiziunali meeting di chjusura, cù un missaghju d'unioni è di lotta davanti à più di milli parsoni. T'avaremi l'uccasioni di vultacci ind'i nostri nutiziali chì venini. Pà vultà nant'à u prublema di i prighjuneri pulitichi, u presidenti di l'Associu Sulidarità, Ghjuvan Maria Poli, hà chjamatu, duranti un discorsu, u populu corsu à mubilizassi di pettu à a negazioni putenti di u guvernu à ssu nivellu quì.
Steti à senta à Ghjuvan Maria Poli.
