Fuite de gaz à Ajaccio : rétablissement prévu aujourd'hui pour 760 clients
Marcuri u tredici di sittembri, versu un’ora è quartu in dopu meziornu, una impresa di travadda publichi chì intarvinia à nantu à a strada hà dannighjatu a reti di u gasu in u carrughju dittu « de l’Archipel » in Aiacciu, versu i Sanguinarii.
Iss’incidenti hè statu causa d’una perdita di gasu, ani spiicatu i sirvizia d’Engie, chì subitu sò mossi supr’à locu.
Culandi, i spinghjifoca ani missu in anda un’arghja di sicurità.
Da ùn piddà risichi, a distribuzioni di u gasu hè stata suspesa un tempu par 760 clienti.
I squadri tecnichi si sò impignati à tratta issu dannu.
I travaddi sò stati iniziati marcuri, è duvariani essa compia oghji.
A distribuzioni di u gasu duvaria ripiddà tocchi i cinqui ori di sera, è l’affari duvaria essa fattu da quì à dumani.
Pà a rimissa in sirviziu, un tecnicu d’Engie si hà da dispiazzà in casa d’ugni clienti.
Par casu ch’idd’ùn ci sichi nimu, sarà spostu un avvisu di passaghju, da pudè cuntattà i squadri d’Engie à u 0 800 47 33 33 (numaru verdu), da ristabiì prestu à distribuzioni.
