Football - Souscription bientôt ouverte pour les Socios du SC Bastia
(A redazzioni d'Alta Frequenza) - Arisera, u Sporting duvia cumincià u so campiunatu di Liga 2 nant'à un tarrenu neutru contr'à Clermont Foot. Ma a rialtà hè quì, u Sporting, a colpa à a gistioni d'una squadra dirighjenti induva cù guasgi ogni ghjornu una gattiva nutizia in più chì s'ampara, ùn vultarà micca in Liga 2 è podassi mancu in Naziunali 1. L'ultimu ricorsu davanti u tribunali amministrativu di Parighji hè statu righjittatu, è a so urdinanza hà parmissu d'amparà chì, sicondu a LFP è a FFF, u club "ùn pruducia micca o pruducia cù assai ritardu i raporti di u so cummissariu à i conti, ciò chì a purtava à avè dubbiti seri nant'à a verità finanziaria di l'infurmazioni cumunicati", chì "l'assemblea generali di validazioni di i conti chjosi à u 30 di ghjunghju di u 2016 ùn s'era micca tinuta è chì u cummissariu à i conti avia lanciatu a prucedura d'alerta, ciò chì u club ùn avia micca dittu subbitu à a cummissioni", ma dinò chì u passivu di u club hè di 21,6 millioni d'auri, è chì i so mezi sò negativi di 9,6 millioni d'auri. Cù sciffri simuli, hè solu un miraculu chì pudaria parmetta à u SC Bastia di francà a tappa di a DNCG marti par u so ingaghjamentu in Naziunali 1. In ssu mentri, i Socios ani da pudè lancià di manera ufficiali in principiu di simana chì veni a so sottuscrizzioni di 50 auri par omu nant'à u situ move.corsica. U scopu, metta un pedi inde u funziunamentu di u club, cù trasparenza è vulintà di rilanciallu, pocu impremi a divisioni, Naziunali 1 o 3, è senza a squadra dirighjenti attuali.
Steti à senta à Anthony Luciani, u presiednti di u Socios Etoile Club Bastiais.
Sur le même sujet
