Football - Processus de reprise enclenché pour le SC Bastia
(A redazzioni d'Alta Frequenza) - Ssu luni dopu meziornu, ci sò stati evuluzioni novi pà u cartulari di u SC Bastia. In fatti, l'associu SC Bastia, chì t'avarà in manu l'avvena spurtivu di u club dopu a bancarotta di a sizzioni prufiziunali, s'hè adunitu. I dirighjenti attuali di l'associu, chì sò dinò i dirighjenti di a sizzioni prufiziunali, ani cunfirmatu a so prumessa di ritiru. Un ritiru chì hà apartu a porta à a ripresa effettiva di l'associu da l'adunita di pruprietari futuri pussibuli lucali cumposta d'una decina d'investidori chì s'era missa in avanti pà pudè ripighjà u club ss'ultimi simani, cumposta, frà altru, di Jean Dominici, Pierre Noël Luiggi o Frédéric Antonetti. Un studiu hè statu cumandatu pà pudè cunnoscia a situazioni finanziaria esatta di l'associu da i pruprietari futuri pussibuli, chì sò, sicondu i so parolli, i rifundatori. Un studiu chì s'hà da fà assai in furia, postu ch'elli passani i ghjorni nanzi a ripresa di u campiunatu di Naziunali 3 induv'ellu s'hà da ritruvà u club. Di fatti, dopu à ssu studiu, ss'adunita cunfirmarà, o micca, a so vulintà di ripighjà u club, ma quissa quì hè più forti cà mai, è duvaria integrà i Socios nentru à u cunsighju d'amministrazioni.
Steti à senta à Pierre Noël Luiggi.
