Football (National) - Le GFCO Ajaccio veut enchaîner face à Nîmes
(A redazzioni d’Alta Frequenza) - Quindicesima ghjurnata di u campiunatu Naziunali, u GFCO Aiacciu ricevi issu dopu meziornu (sabbatu) in Mezavia à u Nîmes Olympique. Firmendu nant’à trè vittorii, trà u campiunatu è a cuppa di Francia, l’aiaccini volini cunfirmà issa bona dinamica battendu una squadra bè arradicata ind’a prima parti di a classifica è chì t’hà pà scopu di ritruvà a Lega 2. I « Diavuli Rossi » sani bè chì un cumpurtamentu di prima trinca è a pratica di un ghjocu seriu sarani l’ingredienti indispinsevuli da pudè vincia issa partita. Da u cantu di u gruppu, pochi cambiamenti duvariani essa fatti da l’allenatori di u « Gaz », Dumenicu Veilex. Un scontru chì prumetti d’essa ingaghjatu assai, è chì principiarà à 3 ori, à u stadiu Ange Casanova.
