Football (National) - Le GFCO Ajaccio écrase le leader Rouen (4-1)
(A redazzioni d’Alta Frequenza) – Tredicesima ghjurnata di u campiunatu Naziunali, è una grossa vittoria pà u GFCO Aiacciu eri dopu meziornu (sabbatu) in Mezavia contru à Rouen, quattru reti à una. I dui primi rialisazioni aiaccini ghjunghjini à a 16ima è à a 24ima minuta, par via di u difensori, Roderic Filippi. Ind’u sicondu periudu, u leader nurmandu riescia à riducia u so ritardu, grazia à Guy N’Gosso, à a 49ima. Una gioia bella corta postu chì deci minuti dopu, Roderic Filippi, particularmenti in forma duranti issu scontru, ni metti un terzu pà contu soiu è pà u gazelec. Un successu chjosu da una quatriesima reta, signata da Nicolas Verdier à a 71ima minuta. A squadra di Rouen sarà stata trapassata tutta a partita, vistu a duminazioni larga di i ghjucadori di Dumenicu Veilex. Trè punti chì facini assai prò à i « Diavuli Rossi », chì t’ani oramai 13 unità pà u stessu numaru di scontri, è chì escini infini da a zona di rilegazioni.
