Football (National) - Le CA Bastia devrait être repêché en National
(A redazzioni d'Alta Frequenza) - In ghjocu à ballò, hè una bona nutizia ch'elli ani amparatu i sustenidori di u CA Bastia stamani (sabbatu). In fatti, duranti una cunfarenza di stampa, i dirighjenti di u club di u Poiré sur Vie ani annunziatu ch'elli ùn ripartariani micca in Naziunali a staghjoni chì veni. "Dopu a riunioni di u Cumitatu Direttori di u vennari u 29 di maghju di u 2015, hè statu dicisu di ùn scriva micca a prima squadra di u VPSVF in campiunatu Naziunali pà a staghjoni 2015-2016. A squadra prima di u VPSVF ghjucarà in CFA2 a staghjoni chì veni" dici u club in un cumunicatu. Cunsiquenza diretta pà u CA Bastia, u club di u presidenti Emmanuelli duvaria dunqua essa ripresu in Naziunali. Dopu avè compiu à u 15imu postu è dunqua primu club ind'a zona rossa, a FFF duvaria pighjà in contu ssa dicisioni. Da un'antra banda, u club di u Poiré sur Vie pudaria ancu riparta in DH, è micca in CFA2. Una dicisioni chì pudaria parmetta à a riserva di l'AC Aiacciu di salvassi dinò à ssu nivellu. Ci vularà à firmà attenti à tuttu què...
Sur le même sujet
