Football (National) - Le CA Bastia accède à la Ligue 2 !
(A redazzioni d'Alta Frequenza) - Storicu pà u ballò corsu è più particularmenti pà u CA Bastia ! I bastiacci ghjucarani in fatti in Lega 2 a staghjoni chì veni grazia à a so vittoria d'arisera (vennari) 2-1 contr'à Créteil, cù un duppiettu di Pastorelli (più bonu attaccanti di u campiunatu cù 26 reti) à a fin di u primu tempu, è apprufittendu à tempu di a disfatta di Fréjus Saint-Raphaël nant'à u tarrenu di u Red Star, dui reti à una. Hè d'altrondi u bastiacciu di u Red Star, Jean Jacques Mandrichi chì hà cuntribuitu à u successu di a so squadra dopu à un scenariu incridibuli, è dunqua hà fà nascia una gioia scema ind'a furmazioni di Stéphane Rossi è pà i più di 1 500 spettatori di u stadiu d'Erbaghjolu. U CAB, chì cullava da u CFA issa staghjoni crea quì una surpresa tamanta, è scuprarà à u mesi di lugliu pà a prima volta di a so storia u mondu prufessiunali. U CA Bastia di u presidenti Emmanuelli, bughjettu u più chjucu di u campiunatu, compii 3u di u Naziunali cù 61 punti, vali à dì un'unità di più cà Fréjus Saint Raphaël, è rimpiazza di fattu in Lega 2 u GFC Aiacciu, chì fala par contu soiu. A cità di Bastia, chì t'hà à l'ingrossu 40 000 abitanti, t'hà dunqua oramai dui clubs prufessiunali, u SCB è u CAB, ind'i dui primi divisioni naziunali !
Ecoutez la réaction de l'entraîneur du CA Bastia, Stéphane Rossi.
Sur le même sujet
