Football (National) - La DNCG permet au CA Bastia de garder son statut professionnel
(A redazzioni d'Alta Frequenza) - Hè ora pà i clubs di Liga 1, Liga 2 è quilli chì sò falati in Naziunali, com'è u CA Bastia, di passà davanti à a DNCG. Un passaghju chì s'hè passatu abbastanza bè, parchì dopu avè ascultatu dirighjenti è asaminatu parechji ducumenti, a DNCG hà validatu u bughjettu di u club cabistu è soprattuttu, ciò chì era a priurità di u club, a cunservazioni pà u CAB di u so statutu prufiziunali acquistatu a staghjoni scorsa quand'ellu hè cullatu in Liga 2, ciò chì hà da parmetta à u club bastiacciu di tena i ghjucadori ch'ellu voli, è di pighjà ni novi cù un cuntrattu prufiziunali. Ind'un effettivu chì ci voli à ricustruiscia inghjiru à una decina di ghjucadori com'è Lombard, Salis o Marty par asempiu, u CAB hà da integrà una decina d'elementi novi. Quattru sò dighjà cunnisciuti, postu chì u CAB hà da ingaghjà i difensori cintrali Mamadou Doumbia, 33 anni chì ghjunghji d'Istres, Remy Ebanega, 24 anni è chì ghjucava in Auxerre, u laterali mancinu Jérôme Sonnerat, 29 anni è chì era in Lausanne Sports in Sguizzera, è Bilel El Hamzaoui, mezu uffensivu di 22 anni chì era fin'è oghji in Angers. Dopu, u CAB suvitaria l'attaccanti di L'Isula di 22 anni, Benjamin Santelli.
Sur le même sujet
