Football (National 1) - Le SC Bastia reste en National 1 mais perd son statut professionnel
(A redazzioni d'Alta Frequenza) - A dicisioni hè cascata ind'è a DNCG di a LFP, u SC Bastia ùn hè più di manera ufficiali un club prufiziunali. Di sicuru, a DNCG hà accurdatu, ghjustu ghjustu, u dirittu à u Sporting di riparta in Naziunali 1 malgradu debbiti assai numarosi, ma caccendu à u Sporting u so statutu prufiziunali. Di manera cuncreta, voli dì chì à partasi da ssu marti, u SCB diventa torna un club amatori, vali à dì chì tutti i cuntratti prufiziunali di a squadra chì ùn sariani micca stata resiliati a sarain di manera automatica, è dunqua a liberazioni subbitu di i ghjucadori di l'effettivu prufiziunali. Una vera catastrofa pà u club, a fini d'una tragedia spurtiva è finanziaria chì hà vistu a gistioni assai gattiva di u club da i so dirighjenti è azziunari rivelata in publicu. Hè a fini di più d'un mezu seculu di prufiziunalisimu pà u club. U Sporting, chì principiarà u 18 d'aostu dopu u rinviu di i so dui primi ghjurnati di campiunatu, devi, in diciottu ghjorni, custruisciasi un effettivu, è duvarà cuntà nant'à a ghjuventù d'una riserva chì, anch'ella, pudaria schjattà, postu chì a perdita di u statutu prufiziunali metti in periculu u centru di furmazioni di u club, postu chì i so ghjucadori sò libarati anch'elli. Impieghi numarosi sò dinò minacciati da ssa dicisioni. U club annunzia ch'ellu "farà un puntu pricisu di a situazioni quand'elli avarani ricivuti l'attesi di a dicisioni"
