Football (Ligue 2) - Mathieu Coutadeur rejoint l'AC Ajaccio (officiel)
(A redazzioni d'Alta Frequenza) - Era aspittatu ed hè oramai ufficiali, Mathieu Coutadeur hè bianch’è rossu dipoi ssu ghjovi. Hà passatu a so visita medicali prima d’ingaghjassi à prò di u club aiaccinu. L’AC Aiacciu ci l’hà fatta dunqua à rinfurzà u so effettivu cù a ghjunta di ssu ghjucadori, chì era assai dumandatu, soprattuttu da Sochaux è Valenciennes. Ci voli à dì chì a carriera di ssu mezu di tarrenu di 30 anni hè ricca : 273 partiti prufiziunali frà i quali 203 in Liga 1. Hà purtatu dinò i culori di u Mans, di Monacu, di Lorient è di Laval. Duvaria essa un elementu maestru di u mezu di tarrenu aiaccinu pà a staghjoni chì veni. Hè u terzu ghjucadori novu di l’ACA, dopu à Anthony Marin (Nîmes) è Cédric Avinel (Clermont). Da un'antra banda, l'attaccanti aiaccinu Mouaad Madri s'hè ingaghjatu pà contu soiu cù u club di Lens pà dui anni (+1). L'ACA duvarà pighjà dinò elementi in più in u settori uffensivu. I nomi di i ghjucadori di u Havre Duhamel è Gimbert sò quilli i più intesi in ssu mumentu. Si parla dinò di Yoane Wissa, ghjovanu attaccanti di 20 anni, chì pudaria essa impristatu da u club d'Angers chì ghjoca in Liga 1.
