Football (Ligue 2) - Mamadou Camara signe au CA Bastia
(A redazzioni d'Alta Frequenza) - U CA Bastia cuntinueghja u so marcatu pà appruntà si pà a Lega 2. Dopu à Philippon, Romey, è l'imprestitu di Vincent, un quattriesimu ghjucadori hè statu presu da u club cabistu. Hè Mamadou Camara, difensori cintrali di 25 anni, chì ùn hè micca statu ritinutu da Guingamp, duva ellu hà ghjucatu 20 partiti di Lega 2 in dui staghjoni dopu essa ghjuntu da Niort. Un marcatu chì ùn hè ancu à compia, postu chì com'è a pudiami risenta dipoi parechji settimani, Jérôme Phojo, difensori laterali di 19 anni, duvaria essa impristatu à lestra da l'AS Monacu. Da nutà chì dui ghjucadori s'intrenani cù u CAB, u difensori cintrali François Marque, senza club dipoi ch'ellu hè partutu da u Sporting Club di Bastia, è Jean Jacques Mandrichi, chì u Red Star ùn hà tinutu postu ch'ellu ùn hà micca prulungatu u so cuntrattu. Malgradu tuttu, ùn voli micca dì chì ssi dui ghjucadori sarani ingaghjati da u club.
Sur le même sujet
