Football (Ligue 2) - Le SC Bastia, englué dans une profonde crise, reçoit Clermont Foot

Sta sera à ottu ori, u SC Bastia, ultimu lla classifica in siconda divisioni, ricevi à Clermont Foot, u quattordicesimu, pà u contu lla tredicesima ghjurnata llu campiunatu. Ma l’ambienti hè beddu tribulatu pà a squadra bastiaccia : u sittori spurtivu, dopu à un attaccu di staghjoni fiascatu in tuttu, si n’hè andatu in pisticciuli.

In prima, in fin’di matinata, hè statu licinziatu Benoît Tavenot, l’addistradori. Com’è di solitu, hè u postu chì salta u primu, masimu cù una squadra ch’ùn hè ancu à vincia è chì ùn hà presu chè quattru punti par undici scontri ghjucati.

Calchì rispunsabilità l’avarà, ben’intesa, forsa cù i scelti fatti par certi scontri, ma tutta a colpa po’ ùn hè soia, chì l’hè ancu tuccata à luttà contru à beddi cuntrarii i venta.

I ghjucadori ch’iddu dirighjia aghjà annu ani persu cunfidenza, ancu quiddi più impignati è vulintarii. Certi, ancu dissatti, pari ch’iddi si volghini batta quantunca. Ma certi altri, parini solu essa spittatori di u distinu d’una squadra chì di a so anima, ùn n’ani presu a misura.

Peghju ancu : uni pochi, chì vurriani fà valè un suppostu talentu in altrù, di u Sporting ùn n’ani pinseri micca.

In quant’à u ricrutamentu, ohimedda ! Mancu unu di i novi ghjucadori ùn l’hà u liveddu par ghjucà in siconda divisioni. Mancu unu di quissi pò pratenda à rimpiazzà à Cissé o à Oulai, vinduti bè ma chì lacani un viotu tamantu !

Issu ricrutamentu hè statu direttu è urdinatu da Frédéric Antonetti, u dirittori spurtivu, chì dicia ancu chì à iss’effittivu ci cridia !

Tandu, avaria pussutu piddà i so rispunsabilità, ricunnoscia i so sbagli è fà da addistradori, chì quissa a l’hà ancu pruposta Claude Ferrandi, u prisidenti di u SC Bastia.

Ma, dindu ch’idd’ùn vulia piddà a piazza d’un addistradori ch’iddu avia sceltu, è supr’à tuttu ch’idd’ùn si vulia pittughjà à u centru d’addistramentu cù certi parsoni radicali, in i so andamenti è in a so aggrissività, Frédéric Antonetti hà dicisu di lascià si issa navi chì pidda fundu.

Mentri issu navifraghju, hè Michel Moretti, l’aghjuntu di Benoît Tavenot, chì si hà da ritruvà solu à dirighja la, issa navi, cù a rispunsabilità di circà à fà vincia una squadra cù pochi qualità par sbuccà ci.

Steti à senta à Michel Moretti.