Football (Ligue 2) - Le CA Bastia espère rebondir à Clermont
(A redazzioni d'Alta Frequenza) - Ssu vennari à 8 ori pà a diciottesima ghjurnata di Lega 2, u CA Bastia andarà in Clermont cù a spiranza di compia l'annata nant'à una bona nota contr'à una squadra di u mezu di a classifica. Dopu à u schjaffu 5-1 presu in casa a settimana scorsa contr'à Caen, l'intrenori di u CAB, Stéphane Rossi, hà fattu sapè a so scuntintezza è hà avutu parolli forti ver di i so ghjucadori u ghjornu dopu à a partita, micca una surpresa quandu si sà chì u cumpurtamentu di certi ghjucadori ùn l'hà micca fattu piacè. Ferma à sapè oramai cosa avarà datu a settimana d'intrenamentu di un gruppu toccu ind'u so urgogliu, è chì duvarà cumpona senza Grimaldi, Phojo, Kanté, Traoré o Monfray, sempri feriti, mentri chì d'altri chì ani dillusu u so intrenori a settimana scorsa ùn si spiazzarani micca pà ss'ultima di a staghjoni. Cù setti punti di ritardu di pettu à a prima squadra fora di a zona rossa, un puntu saria u benvinutu.
