Football (Ligue 1) - Yatabaré quitte le SC Bastia, Krasic le rejoint
(A redazzioni d'Alta Frequenza) - U marcatu di i trasferimenti movi ind'u Sporting Club di Bastia. Prima, u Sporting arrighjistreghja una partenza, quilla di Sambou Yatabaré. Un accordu hè statu trovu cù u club grecu di l'Olympiakos pà un trasferimentu difinitivu, cù un'indennità di 2,5 millioni d'auri pà u Sporting, Yatabaré avendu firmatu in Grecia fin'è u 2017. À u nivellu di i ghjunti, u Sporting hà rializatu un grossu colpu nant'à u marcatu cù un ghjucadori ricunnisciutu à u nivellu internaziunali. In fatti, u club di Fenebahce hà trovu un accordu cù u Sporting pà l'imprestitu di u mezu uffensivu dirittu serbu Milos Krasic. À 28 anni, quissu quì hà dighjà fattu una bellssima carriera, essendu passatu pà u CSKA Moskva, a Juventus di Turinu duva ellu era un titulariu di trinca in u 2010-2011, è Fenebahce, duva quissu quì, cumpratu pà 8 millioni d'auri ind'a Juve a staghjoni scorsa, ùn s'hè micca adattatu. U Sporting Club di Bastia trapassa nant'à ssu cartulari l'Olympique Lyonnais chì avia fattu di l'internaziunali serbu una di i so priurità.
