Football (Ligue 1) - Sébastien Squillaci signe au SC Bastia
(A redazzioni d'Alta Frequenza) - U Sporting Club di Bastia circava un rimpiazzanti à Sylvain Marchal, chì hè partutu pà andà in Metz calchì ghjornu fà, l'hà trovu oramai. Ed hè un bellissimu colpu ch'ellu faci u Sporting, postu chì hè Sébastien Squillaci, chì s'hà da ingaghjà ssu ghjovi dopu à una visita medicali pà un annu cù un'uzzioni di un'annata in più s'è u SCB si manteni. U difensori corsu, 33 anni è settesima ghjunta bastiaccia, hà passatu i dui ultimi staghjoni in Arsenal ghjuchendu solu sei partiti, ma t'hà una carriera propiu ricca. In fatti, quillu chì hà principiatu à l'AC Aiacciu in u 2000 hà ghjucatu una finali di Lega di i Campioni cù Monacu in u 2004, hè statu selezziunatu vint'unu volti cù a squadra di Francia (una in Cuppa di u Mondu 2010) ed hè passatu pà parechji clubs com'è Monacu, Liò, Sevilla è Arsenal. Cù François Modesto, furmarà un centru di difesa di sparienza, postu ch'ellu hà participatu à 179 partiti in Lega 1 è à 44 in Lega di i Campioni duranti tutta a so carriera, una data impurtanti pà stabulizà a difesa.
