Football (Ligue 1) - Sambou Yatabaré prêté au SC Bastia
(A redazzioni d'Alta Frequenza) - U SC Bastia hà arrighjistratu una siconda ghjunta pà ssu marcatu d'inguernu. In fatti, com'è a vi diciami dipoi ss'ultimi ghjorni, u mezu difensivu malianu Sambou Yatabaré, vechja cunniscenza di u publicu di Furiani par essa dighjà statu un ghjucadori impurtanti di u Sporting a staghjoni scorsa, t'avarà cinqui mesi di cumpetizioni pà dì daveru addiu à u SC Bastia, ch'ellu avia lacatu in furia duranti l'ultimi ori di u marcatu di i trasferimenti à u principiu di u mesi di sittembri scorsu. U mezu difensivu hè statu impristatu senza uzzioni par essa cumpratu da l'Olympiakos le Pirée, dopu ùn avè micca riisciutu ad impona si culà par avà. Una suluzioni ideali pà i trè parti chì era divintata evidenti à a mità di u mesi di dicembri, ma a cuncretisazioni hà missu un tempu propiu rilativu pà difiniscia u nivellu di presu in carica di a paga di u ghjucadori da u Sporting. Quissu quì hà da raghjunghja u gruppu bastiacciu à partasi di ssu ghjovi.
