Football (Ligue 1) - Sadio Diallo de retour au SC Bastia
(A redazzioni d'Alta Frequenza) - Dopu a prulungazioni di François Modesto pà una staghjoni, hè una ghjunta chì si duvaria cuncretizà da quì à calchì ora. In fatti, mentri chì a partenza di Ryad Boudebouz pari guasgi sicura pà pudè participà à u ritornu à l'equilibriu di i conti di u club, u so rimpiazzanti si duvaria ingaghjà in furia cù u Sporting. Un ghjucadori chì u publicu di Furiani cunnosci strabè è ch'ellu hà tinutu caru duranti u so passaghju cortu, postu chì hè u guineanu Sadio Diallo chì sarà ssu vennari in Bastia pà passà a tradiziunali visita medicali, prima, sicondu u club, d'ingaghjassi pà trè anni. S'è i mudalità di trasferimentu ùn sò micca cumunicati, hè pussibuli chì u Stade Rennais avissi sceltu di libarà Sadio Diallo di u so cuntrattu, postu chì u so passaghju in Rennes hè statu un fiascu, mentri ch'ellu era statu cumpratu à u Sporting pà trè milioni d'auri in u 2012; un fiascu in Rennes ma dinò duranti u so imprestitu in Lorient. Quillu chì hà fattu sunnià u publicu di Furiani in Naziunali è in Liga 2 t'avarà com'è missioni difficiuli di pighjà a seguita di Ryad Boudebouz pà pruvà à rilancià a so carriera ind'u club chì l'hà fattu cunnoscia da u mondu di u ballò francesi.
