Football (Ligue 1) - Quatre joueurs quittent l'AC Ajaccio
(A redazzioni d'Alta Frequenza) - U presidenti di l'AC Aiacciu, Alain Orsoni, l'avia ditta. Ci sarani i cambiamenti ind'u club duranti ssu mesi di ghjinnaghju. Quattru ghjucadori si ni sò dighjà andati di manera ufficiali, o sò in traccia di fà la. Ghjuvan Battì Pierazzi, furmatu ind'u club è capitanu dipoi parechji anni, s'hà da ingaghjà da quì à calchì ghjornu pà quattru anni cù u club americanu di San Jose, in California, chì ghjoca in prima divisioni US. Brandon Deville, un ghjovanu belgu, chì hà ghjucatu veramenti pocu dipoi a so ghjunta in Aiacciu, hà da andà in siconda divisioni belga, impristatu in Westerlo. Com'è Chahir Belghazouani, chì hà da andà ind'un campiunatu ch'ellu cunnosci bè. Infini, u quattriesimu hè Adrian Mutu. L'internaziunali rumenu, chì hà fattu un bellissimu primu annu in Corsica, ferma nant'à un fiascu pà a staghjoni attuali. Sicuru di parta, pudaria andà ind'un club rumenu da quì à calchì ghjornu. Altri ghjucadori si ni pudariani andà duranti i ghjorni chì venini. À u nivellu di i ghjunti, u club vularia buscà si un attaccanti, è travaghja nant'à parechji cartulari pà imprestiti.
