Football (Ligue 1) - Memo Ochoa convoité par le Milan AC
(A redazzioni d'Alta Frequenza) - Dipoi ch'ellu hè ghjuntu in Aiacciu in u 2011, Memo Ochoa, hè propiu rimarcatu. Sò parechji mesi chì u so nomu hè citatu in parechji clubs aurupei (Napuli, Seviglia, Liverpool, Olympiakos), à tal puntu chì una partenza era divintata una vera pussibilità ss'istati di u 2013. Ghjudichendu l'ufferti micca abbastanza intarissanti, o cuncreti, u presidenti di l'AC Aiacciu, Alanu Orsoni, avia ricusatu l'idea di veda parta u guardianu emblematicu di a selezzioni messicana. Dopu à dui staghjoni magnifichi à l'ACA, Memo Ochoa hà fattu torna parlà d'ellu dumenica à sera, ind'u Parc des Princes, cù una parfurmenza d'altissimu nivellu. Ss'ultima hè stata rimarcata postu chì u nomu di Memo Ochoa circuleghja torna, è ancu di più ss'ultimi ori, par asempiu vicinu à grandi clubs, com'è in Italia. Sicondu media taliani è messicani, l'AC Milanu si vularia buscà u guardianu di l'AC Aiacciu. Memo Ochoa pudaria rimpiazzà à Christian Abbiati, chì ùn hè cusì bonu dipoi calchì mesi. Sempri sicondu a stampa taliana, un trasferimentu pudaria accada da quì à pocu è saria vicinu à 7 millioni d'auri. S'è ss'infurmazioni duvia essa cunfirmata, l'ACA ùn pudaria tandu forsa micca ritena u so guardianu.
Sur le même sujet
