Football (Ligue 1) - Masse salariale encadrée pour le SC Bastia
(A redazzioni d'Alta Frequenza) - Dopu avè aspittatu parechji ghjorni, a dicisioni di a DNCG cuncirnendu u SC Bastia hè stata cumunicata. In fatti, l'urganisimu di cuntrollu di gestioni hà validatu a prisenza di u Sporting in Liga 1 pà a staghjoni chì veni, postu chì u club annunzia chì a massa di i paghi sarà inquadrata senza pricisà par avà cù chì dimensioni, una dicisioni chì ùn hè micca calcosa di novu postu chì annu, a massa salariali di u club era dighjà stata inquadrata à u nivellu di novi millioni d'auri. Ferma à sapè s'è ssa misura dicisa pà ssa staghjoni, s'ella duvia cambià di pettu à annu, sarà più o menu imbistianti, ciò chì t'avarà cunsiquenzi nant'à a quantità è soprattuttu a qualità di i ghjucadori novi. Ramintemi chì u Sporting avia prisintatu un sbilanciu di 750 000 auri nant'à l'eserciziu chì s'hè compiu u 30 di ghjunghju, è un bughjettu previsiunali di 28 millioni d'auri pà a staghjoni chì veni. Da un'antra banda, Julian Palmieri, dopu à parechji mesi d'incertezza, hà dicisu d'ingaghjassi cù Lille, postu ch'ellu era libaru dipoi a fini di u so cuntrattu cù u Sporting u 30 di ghjunghju.
Sur le même sujet
