Football (Ligue 1) - Lourde défaite du SCB à Lorient
(A redazzioni d'Alta Frequenza) - A bella seria di vittorii di u SC Bastia s'hè compia à u stadiu di u Moustoir di Lorient, duva u Sporting hà persu largamenti 4-1. À u principiu di u scontru, Lorient duminava dighjà, di modu timicu o più putenti sicondu i mumenti contr'à bastiacci pocu ispirati à l'attaccu ma piuttostu solidi in difesa. Una sulidità chì hà lintatu malgradu tuttu à calchì siconda di a fin di u primu tempu quandu Jouffre hà battuttu à Landreau à l'intrata di a so zona. Dopu à a pausa, Lorient hè vultatu nant'à un ritimu simuli è duppiava l'affari à a 54a minuta, quandu nant'à un tiru rinviatu da Landreau, Corgnet surghjia pà scriva una reta ind'una difesa bastiaccia assenti. Duranti deci minuti, u Sporting hà pruvatu à riagiscia, avendu calchì uccasioni pà riducia finalmenti u scartu cù un'incapata di Modeste à a 58a minuta. Ma Lorient hà ripighjatu a suprana dopu, essendu meghju di manera difinitiva cà i bastiacci nant'à u so tarrenu sinteticu. È dopu à una perdita di u ballò da Khazri, Aliadière hè ghjunta à batta à Landreau à a 75a minuta. Ottu minuti dopu, quissu quì scrivia un duppiettu è a quatriesima reta brittona pà fà la finita. À a classifica, u Sporting ferma quantunqua dodicesimu cù ottu punti di più cà Nancy, prima squadra ind'a zona rossa, ma si duvarà ripighjà nanzi di riceva à Lille, un scontru chì s'annunzia propiu difficiuli, dumenica chì veni.
On écoute Jérôme Rothen au micro de BeIn Sport
