Football (Ligue 1) - Le SC Bastia ambitieux avant d'affronter l'AS Monaco
(A redazzioni d'Alta Frequenza) - Dopu merzionu (sabbatu) à 5 ori pà a 25a ghjurnata di Lega 1, u SC Bastia, 8u, hà da riceva l'AS Monacu, u sicondu di u campiunatu daretu à u PSG. Ed hè ind'un'ambienti chì duvaria essa propiu caldu, a prova cù a chjama di i dirighjenti di u Sporiting "à u fervori è à un cori tamantu" di u populu turchinu chì hà "fattu a storia di u club", chì i bastiacci vularani, com'è a dici a chjama, "fà mova a ierarchia". Parchì ssu Monacu hè u primu di trè pizzoni chì ani da ghjunghja in Furiani, l'AS Saint Etienne è u Parighji Saint Germain sbarcarani dopu. Ind'una sittimana duva par avà, i bastiacci ani presu sei punti in una partita cù a vittoria in Toulouse è i trè punti riguarati infini dopu à l'errori amministrativu di Nantes à u principiu di a staghjoni, una vittoria contr'à Monacu pudaria custituiscia bè u principiu di una fin di staghjoni più intarissanti cà quillu chì omu vidia dopu à u scontru catastroficu di i bastiacci in Marseghja sabbatu scorsu. Ma batta u mostru di Monacu, ancu puru senza Falcoa o Berbatova, sarà assai difficiuli pà un Sporiting chì hà vintu solu contr'à una squadra di u top 10, Bordeaux, dipoi u principiu di a staghjoni in casa soia. Frédéric Hantz, chì mittarà u listessu ondeci è u listessu schema cà in Toulouse, pò cuntà malgradu tuttu nant'à u ritornu di Ryad Boudebouz nant'à u bancu.
Steti à senta à Frédéric Hantz.
Sur le même sujet
