Football (Ligue 1) - L'arrivée de Mehdi Mostefa au SC Bastia est imminente
(A redazzioni d'Alta Frequenza) - À calchì ghjornu di a fini di u marcatu di i trasferimenti, u SC Bastia avaria fattu a so scelta cuncirnendu u cartulari di u mezu di tarrenu tantu aspittatu. In fatti, dopu à parechji sittimani passati annant'à u cartulari Guillaume Gillet, chì malgradu a vulintà di u Sporting è di u ghjucadori ùn s'hè mai pussutu cuncretizà, hè un'antra pussibilità chì si cunfirmaria. U cundiziunali devi essa maestru malgradu tuttu dopu à l'episodiu Etoundi calchì sittimana fà, ma ssu ghjucadori duvaria essa quillu di Lorient, Mehdi Mostefa. Sicondu u Sporting, l'internaziunali algerianu hè aspittatu ssu vennari pà signà u so cuntrattu di dui anni cù un annu in uzzioni dopu à a so visita medicali. Hè un prufilu di ghjocu vicinu à quillu di Yannick Cahuzac ch'ellu t'hà l'anzianu ghjucadori di l'AC Aiacciu, chì currispondi à i brami di Ghislain Printant.
