Football (Ligue 1) - L'ACA perd sa licence club et 2,3 millions d'euros
(A redazzioni d'Alta Frequenza) - Hè un colpu duru. Un colpu assai duru ancu pà l'AC Aiacciu. In fatti, u presidenti di a Cummissioni di gistioni di a Licence Clubs, Hugues Moutouh hà prisintatu oghji (marcuri) davanti à u Cunsighju d'Amministrazioni di a LFP i travaghji di a Cumissioni d'attribuzioni di i Licence Clubs pà a staghjoni 2013/2014, è u club aiaccinu ùn hè micca ind'a lista. L'AC Aiacciu hè l'unicu club di prima divisioni inde ssa situazioni, chì avia toccu dinò Gazélec l'annu scorsu in Lega 2. S'è u GFCA ùn hà micca pussutu tuccà 800 000 auri di i so diritti TV, l'ACA duvarà sbruglià si senza 2,3 millioni d'auri. Malgradu tuttu, ind'u so cumunicatu, a LFP priciseghja chì "i clubs chì ùn ani micca uttenutu a Licence Clubs dopu à ssa prima sessioni t'ani oramai a pussibilità di prisintà u so cartulari una siconda volta duranti a sessioni d'appellu di sittembri à a Cumissioni di gistioni di a Licence Clubs". Da nutà chì ssa famosa Licence Clubs hè stata rinfurzata, cù criterii chì sò più esigenti rilativi à u tarrenu, l'accolta di i spettatori, a securità è a strutturazioni salariali di i clubs. U club t'hà dunqua dui mesi pà cambià una situazioni chì pudaria essa una catastrofa s'ella duvia essa cunfirmata. Ssa dicisioni hè daveru una surpresa, soprattuttu chì u club hà fattu sforzi maiò in materia d'infrastrutturi cù, u lanciamentu di l'ultima tappa di i travaghji (migliurazioni di i cundizioni d'accolta, i vestitoghji è una nova tribuna di 4000 piazzi), è soprattuttu a ricunniscenza ufficiali di u so centru di furmazioni, resa pussibuli grazia à a custruzzioni di tarreni d'intrenamentu, in naturali è sinteticu, nant'à u situ di François Coty. Dighjà in u 2005, una situazioni simuli avia cacciatu à u club 25% di i so diritti TV. L'ACA era falata in Lega 2 dopu à ssa staghjoni. Spiremi chì stavolta, a sorti finali sarà altra.
