Football (Ligue 1) - L'AC Ajaccio veut recruter Adrian Mutu
(A redazzioni d'Alta Frequenza) - L'AC Aiacciu, è u so presidenti Alanu Orsoni, parini bè dicisi à riescia un colpu grandissimu nant'à u marcatu di i trasferimenti. Dopu à Memo Ochoa, star messicana, a staghjoni scorsa, i ricrutori aiaccini volini oramai rinfurzà u settori uffensivu cù un ghjucadori di prima trinca. Si sà chì i dirighjenti sò in traccia di neguzià cù l'ecchisi Marsighjesi, Brandao. Ma altri vii sò attivati. A più seria, quilla purtendu à Adrian Mutu hè spuntata oghji. L'internaziunali rumenu di 33 anni (72 selezzioni, 33 reti), hà cunnisciutu fin'è avà una carriera bella piena, postu chì iss'ultimu hà purtatu i culori di squadri com'è Chelsea (38 partiti, 10 reti), a Juventus di Turinu (46 partiti, 11 reti), Parma (35 partiti, 22 reti), o ancu l'Inter Milan, Verona, a Fiorentina. Annu fà, l'ecchisi internaziunali ghjucava sempri in Italia, in Cesena (26 partiti, 8 reti). Rilegatu in Seria B cù u so club, Adrian Mutu ritrova quantunqua a so libertà, com'è a mintuveghja u so cuntrattu cù a squadra taliana, mentri ch'ellu li firmava dui anni à fà. D'appressu à a stampa taliana è u ghjurnali L'Equipe, l'affari saria assai bè ingaghjatu. Un cuntrattu di dui anni hè statu prupostu à l'internaziunali rumenu, chì t'avaria pratinzioni finanziarii menu impurtanti cà quilli di Brandao.
