Football (Ligue 1) - L'AC Ajaccio veut conclure à Nice
(A redazzioni d'Alta Frequenza) - 21a ghjurnata di Lega 1, l'AC Aiacciu ghjoca stasera (sabbatu) à 8 ori nant'à a Côte d'Azur contr'à l'OGC Nizza. U scopu pà l'aiaccini, sempri ultimi di u campiunatu cù novi punti di menu di pettu à u primu club fora di a zona rossa, sarà di cunfirmà i belli cosi dimustrati a settimana scorsa in casa contr'à Parighji, malgradu a disfatta. I ghjucadori di Christian Bracconi circarani à fà nascia una dinamica nova nant'à u tarrenu di l'Allianz Riviera contr'à una furmazioni cù una classifica, 14u, chì ùn rispechja mancu appena a qualità di u so effettivu è di u ghjocu pruduttu. Pà ssu scontru, l'intrenori corsu ùn pudarà micca cuntà nant'à Perzo, feritu, è Gonçalves, suspesu; inveci, Zubar hè infini di ritornu in difesa, mentri chì i ghjovani Leca è Remiti, di u centru di furmazioni, ghjunghjini ind'u gruppu. Da nutà chì u gattivu tempu, pà ssu casu quì l'acquati forti, minaccia ssa partita; i dirighjenti di u club nizzardu ani dunqua dicisu di copra u tarrenu di u stadiu. A dicisioni di ghjucà ssa partita o micca duvaria intarvena ind'a ghjurnata.
Steti à senta l'intrenori aiaccinu, Christian Bracconi.
