Football (Ligue 1) - L'AC Ajaccio approche déjà les 5.000 abonnés
(A redazzioni d'Alta Frequenza) - U situ ufficiali di l'AC Aiacciu hà annunziatu ssu luni chì 4600 carti d'abbunamentu sò dighjà stati vinduti. À più di un mesi di a fin di l'abbunamenti, u sciffru u più maiò ind'a storia di u club (5000 abbunati à l'ingrossu) sarà trapassatu è largamenti. Di logica, u club aiaccinu, chì custata cresciti forti in ssu duminiu tutti l'anni, duvaria essa cuntentu. Ma ùn hè cusì simplici. In fatti, ssa situazioni pudaria divintà un prublema quandu si sà chì l'ultima tappa di i travaghji di u stadiu François Coty hà cuminciatu, è chì a tribuna Honneur hà da essa distrutta da quì à calchì ghjornu, fendu passà di manera pruvisoria a capacità di u stadiu da 11.000 à 8.000 piazzi (prima d'essa à più di 12.000 à a fin di i travaghji). Pà a staghjoni chì hà da principià, u club aiaccinu pudaria avè un numaru d'abbunati troppu impurtanti, è dunqua l'affari divintariani difficiuli. Tandu i dirighjenti pudariani pighjà a dicisioni di fà compia più prestu a campagna. Saria dunqua meghju chì i sustenidori di l'ACA chì ùn sò ancu ad abbunà si pà a staghjoni chì veni, si spiccessini pà micca avè una gattiva surpresa...
