Football (Ligue 1) - Ghislain Printant ne serait plus l'entraîneur du SC Bastia
(A redazzioni d'Alta Frequenza) - I storii d’amori si compiini mali in generali, dicia una canzona. Pari ch’ella sighi u casu dinò pà quilla trà Ghislain Printant è u SC Bastia. In fatti, sicondu u ghjurnali l’Equipe, l’intrenori saria statu rinviatu ssu marcuri tardi in a sirata. Una dicisioni chì saria liata à i gattivi risultati di u club, ma dinò à tinsioni cù una parti di i ghjucadori. Soprattuttu, s’è i dirighjenti di u Sporting sò stati cuntenti da u suldatu Printant, chì a staghjoni scorsa hà rilanciatu una squadra à caternu dopu u passaghju di Claude Makélélé, chì duvia fà francà un veru passu à u club di più cà Frédéric Hantz à parè di a squadra dirighjenti, ùn hè micca cù una brama tremenda chì Ghislain Printant era statu prulungatu à u cumandu di a squadra bastiaccia malgradu una finali di Cuppa di a Liga è un mantenimentu l’ultima staghjoni. Cù menu voglia è cù un effettivu limitatu par via di i prublemi finanziari di u club, Ghislain Printant, pocu cunsultatu annant’à u marcatu duranti a statina, ùn ci la facia soca à rilancià torna una squadra in difficultà quist’annu. A so partenza hè u puntu finali di a rinascita di u Sporting, postu ch’ellu era ghjuntu pà essa à u capu di u centru di furmazioni di u club à tempu à Frédéric Hantz, mentri chì un Sporting assai debbuli ripartia in Naziunali. Sabbatu, François Ciccolini, aghjuntu di Ghislain Printant chì t’hà u famosu BEPF, duvaria intrenà u Sporting contr’à Liò. Un tempu pruvisoriu chì si prulungarà o micca, com’è quillu di un certu Ghislain Printant a staghjoni scorsa.
Sur le même sujet
