Football (Ligue 1) - Frédéric Antonetti candidat au rachat du SC Bastia
(A redazzioni d'Alta Frequenza) - Da a so tarra natali di Vinzulasca, Frédéric Antonetti hà fattu dichjarazioni putenti cuncirnendu u SC Bastia. In fatti, l’anzianu intrenori bastiacciu hà annunziatu nant’à Canal + ssa dumenica ch’ellu hè prontu à vultà, ma stavolta com’è azziunariu maiò di u club. Di modu cuncretu, Frédéric Antonetti hè prontu à investiscia una parti di a so furtuna parsunali par avè i puteri sani è essa in misura d’appiecà u so prughjettu spurtivu, arrimbatu soprattuttu à a furmazioni d’appressu à ellu. Hà incalcatu nant’à u fattu d’ùn essa micca uppostu à l’idea d’avè à tempu a funzioni d’azziunariu principali di u club è quilla d’intrenori o di direttori spurtivu duranti dui o trè staghjoni. Dichjarazioni putenti dunqua, chì pudariani fà mova infini l’affari in u Sporting. Pà ciò chì tocca l’azziunari attuali, cù ss’affari novu, una cumunicazioni franca è chjara nant’à i so brami di lacà o micca u club si duvaria impona, di pettu à a cuntistazioni chì cresci sempri di più inde i sustenidori, di più in più numarosi à vulè a so partenza u più prestu pussibuli. Inde i pruprietari futuri pussibuli, chì asistini bè ma chì fermani piattati, dichjarazioni simuli i pudariani fà parlà infini. Elementi chì pudariani schjariscia a situazioni di un club chì n’hà propiu bisognu.
Steti à senta à Frédéric Antonetti intarrugatu da Canal +.
Sur le même sujet
