Football (Ligue 1) - François Modesto devrait revenir au SC Bastia
(A redazzioni d'Alta Frequenza) - U Sporting Club di Bastia duvaria cuncretizà a ghjunta di un novu ghjucadori d'impurtanza pà a so difesa. In fatti, com'è a diciami dighjà à a fin di maghju, è ancu s'è l'affari hè statu duru, François Modesto, chì t'avarà 35 anni da quì à pocu, duvaria fora di una surpresa à l'ultima minuta vultà in Bastia pà purtà a maglia di u club chì l'hà furmatu. Modesto, chì hà vistu u so cuntrattu compia si cù l'Olympiakos hà fattu finalmenti a scelta di u cori, malgradu una bella pruposta di u club grecu in tarmini spurtivi. Di fattu, quillu chì Furiani hà cunnisciutu com'è difensori cintrali ma chì omu hà vistu soprattuttu com'è mezu difensivu dipoi a so ghjunta in Grecia duvaria firmà da quì à a fin di a settimana un cuntrattu chì saria di un annu. Quillu chì hè natu ind'u quartieru di Lupinu darà tutta a so sparienza à issu settori difensivu, dopu una carriera ricca in Cagliari, Monacu è à l'Olympiakos. Saria tandu a terza ghjunta di u club dopu à quilla cuncretizata di Drissa Diakité è quilla annunziata di manera chjara di Florian Raspentino, impristatu da Marseghja.
Sur le même sujet
