Football (Ligue 1) - Florian Raspentino bientôt au SC Bastia ?
(A redazzioni d'Alta Frequenza) - U Sporting Club di Bastia cuntinueghja à circà novi ghjucadori à u marcatu di i trasferimenti chì aprarà marcuri chì veni. È mentri chì a firmatura di u difensori Drissa Diakité hè dighjà sicura, u Sporting prova à cuncretizà parechji cartulari. U club, chì aspetta a risposta di François Modesto in difesa, cerca dinò à l'attaccu. Mentri chì u club prova à arrighjistrà a ghjunta di u ghjovanu Nicolas Bénezet, in issu mumentu in Nîmes è vulsutu da parechji clubs di Lega 1, un antru cartulari pudaria sbuccà più prestu inveci. In fatti u Sporting saria in traccia di discorra cù l'Olympique de Marseille pà fà impristà Florian Raspentino, mezu uffensivu laterali francesi è algerianu di 24 anni. In cuncurrenza forti ind'u club marsighjesi cù altri ghjucadori dopu essa partutu da Nantes, quissu quì hà ghjucatu a siconda parti di a staghjoni compia in Brest (19 partiti, 4 reti scritti).
Sur le même sujet
